1 Corinthians 14

1Ntucenu, fye la bugba shi yeye nu; ama dudu lonu fye ɓa ntuge fya bwa anyagaga Zafun Gyi-gyi-yi nya tun ɓa ga Shekwoyi ɓeda kpeda ba.

Ɓeda Nkwo Du Vinya N Anyi

2Oza wo daɓo n nabyei gbo-gbo, wo ta daɓo n azai nu, ama n Shekwoyi yi. Ntuge zaho-zahoi ta wo nya wo dam ko da shike wo da aɓo nu nɓa bwi zhi dna n Zafun iko. 3Ama oza wo gwo Shekwoyi ɓeda gna aza, wo bma ɓa zhin nu ɓa mwa dna n Dagayi, woi mi ɓa zhi n natna-zhin-yi ɓe. 4Oza wo daɓo n nabyei gbo-gbo, wo mi wohin nu gni nʼwo gmanyi yi, ama oza wo go Shekwoyi ɓeda gna aza, wo mi ikklisiya nu gni vinya.

5Miɓa ye ntuge ofye vinya fya daɓo na nyitalai gbo-gbo. Ama mi gna ye lo ofye vinya fya bwa nyaga n fye ɓa da Shekwoyi ɓeda. Ntuge oza wo da Shekwoyi ɓeda, wo gnasun napma yi nduʼza wo daɓo na nyitalai gbo-gbo. Akpe wa pmi wo ɓeda bma ga aza ʼn navun aɓo wa da nyi, ntuge kwa mi ikklisiya gni vinya.

6Oma-zaje, ndei ma ɓe fyaba mi-i daɓo na nyitalai gbo-gbo nfye ta wo ɓa lon, kni-apmai nu nfye ɓa bwa? Ama nʼma gna fye pei-pei enya Shekwoyi la kpanyaya wu mi, ma gna fye ɓo mi kpeye lo, n ɓeyi nko ɓelo kwa zhin, n gaiciya Shekwoyi ɓeda nya yi-oɓo nu fye yelo, oɓo nu ko ɓa bma fye zhin. 7Ko anyikonya nɓa to wyewyei yin–ngye mwayi ko gojegye-ɓa zhin dogbe nu ge ko kamata lo a daɓo n seseiya, a fwa ɓeda na nyitalai gbo-gbo. Ntuge nna bye mwayi, ko a san gojegye to a ze ɓa bwam, ɓa cibwi gbo-o, nyikado ɓa kpe ɓeye n ɓa da? 8Njesun ndei oza wo bye okun mwayi n wo to byeko dai-dai m, nyikado ɓa kpe ge a ye a lo kun nu wa zhin shiriʼa? 9To-ko wu lonu, aza ɓa kpe nya ho da n wuna ndei ho to da n byei n nazaje ɓa wo ma? Oho ɓeda ɓa zo fi nʼse.

10Abye lo gbo-gbo n nanyimi, ama doho-dohoi to celo ntna kwa wyegam. 11Ama n mi to wo nyitala n nada nyim, oza nwo dako nyi, wo ɓa ze ngye zhiɓeyi ebye do nya mʼma ba, omi ce ma ze zhiɓei ebyedo n wa ba. 12Shikwonyi fye ye lo fya bwa nyaga zafun nya, to, sai fye ye fya bwa ado nfye ɓa zhin apma cei ntu ikklisiya migni ɓo.

13Ntuce nu oza wo daɓo n nabyei gbo-gbo, ko bmiya wa zhin aduwa ntuge wa bwa iko bmapmi nya. 14Ntuge n ma zhin aduwa n nyitala doyi, mʼmi ta kpe kwa wyegan, to, omi zafun nu bwa aduwa zhin, ama omi bugba ɓemwi nya to na pmai lo dna na duwa yi mim.

15To, miɓa zhin wuna na? E, miɓa zhin aduwa n nyitala doyi, mii ɓa jezhin n nyitala yi n zaho-zahoi ɓa wo mi cei. Miɓa ko anyi n nyitala doyi, mi-i ɓa jeko n nyitalai n zahozahoi ɓa womi, miɓa kpe mihin ce she mi la Shekwoyi tu lo n wu. 16Esanu ho zhin Shekwoyi godiya dna zafun kawai, hoi da nyitala woyi ho, aza ɓa gnifi hoi n nyakun nyi, ɓa ɓa wo wuna ɓa gni Shekwoyi godiya zhin nʼho ya? Ɓa ɓa kpe cige “Amin,” wuna to ɓai wo ɓo ho da ma?

17Kwo oho godiya zhin yi bmiya n Shekwoyi aba, ko to mi azaje zhi n ɓa kunsun lo hoi n bugbam.

18Ma gode n Shekwoyi yi ntuge mi daɓo na nyitala woyi yi ndu zaho-zahoi nʼfye mi. 19Ama dna na duwa nyakun, mi gnaye lo ma da aɓeda ngun atnu, n naza ɓa wo mi nyawu ɓa bwa bmazhin, aiya gna ge mi da aɓeda dubu gun-awo dna nyitala woyi.

20Omazaje, fye to ku wu ngye aɓi dna fye aɓenubozhinm, fye ku ze aɓi dna ɓenukwoi zhin mi, ama fye ku ze azayakwo dna nfya ɓe nubozhin mi. 21Acei kafi lo n Littafi ge, “Miɓa daɓo nazaye yi n nabyei gbo-gbo, nna zhiɓeyi nyitalai jesun, ama dudu lonu, ɓata wo mi ɓedam,” Shekwoyi nu na gna lonu. 22Ntucenu nyaga aɓeda nya na nyitalai gbo-gbo ko zhin tuze nu na tnaviyi aba toge a Yesu viyi m, Ama nyaga Shekwoyi ɓeda waʼazi nya ko zhin a Yesu viyi nya nu toge atna viyim. 23To, ko n fya ye fi na duwa nyakun, ofye vinya fya ya ɓeda na nyitalai gbo-gbo, tna ɓeyekpei ho ko tna viyi ho wa loɓe aduwa nyakun, wo ta gna nyace nu gnu fyem?

24Ama n fya zhin Shekwoyi ɓeda waʼazi efye vinya, esanu zaho ngye tnaviyi ho, ko tna-ɓeyekpei ho ɓa loɓe aduwa nyakun, waʼazi yi ɓa zun wo kni tu nwa laifi tukwo, kwa dawo bugba ʼwa njesun. 25Owa ɓenubozhin ɓa kun zhi n bmi, har wo ɓa ce ako-ko wa ga Shekwoyi mwa-mwa woi cige, “Ɓehin-hin, Shekwoyi dnalo ya n fye atasin.”

Azokwo Dagayi Cici Nya

26To, emazaje, oɓo nyi mi gna fye; esanu fya yezhi na ba gmanyi, zaho ɓa ko-anyi, zaho ɓa wuʼnya, zaho wa da ɓo woyi n Shekwoyi a kpeya wuwo; zaho kwa, wa daɓo n nyitala woyi yi, zaho kwa wa pmi nyitala woyi ɓeda bma. Azhin a pma n ɓai vinya ntu ekklesiya migni ɓo. 27Aza to du ngun aba ko ata yam n ɓa ɓa daɓo n nyitala woyi yim, ɓai ɓa bwada ɓai caba gaje nu; tile nu kwa a gye za gniɓo nwo ɓa pmi ɓeda bma. 28Ama n zaho to gnilo n wo ɓa mi wa pmi ɓeda bmam, to zaho-zahoi to daɓo n nyitala woyi yi dna n begye m, sai dai wa da fi nwo mi san-san ga wohin tukwo n Shekwoyi aba yi njesun. 29Aza ngun aba ko ngun ata n ɓa Shekwoyi ɓedai shi lo to sai ɓa da gmanyi-gmanyi, aza ɓa ce nyi kwa, Ba mwi nya nɓa da nyi. 30Ama ngye zaho dnalo na duwa nyakun yi Shekwoyi ɓeda ɓe dawo dnaɓo, to oza kmisunyi nwo ɓo daɓo nyi, wa a ce pi n kasun. 31Ofye vinya nfye nyaga yi pyai lo, fye ɓa mi fya da Shekwoyi ɓeda fye caba ga je, n nabai aza vinya ɓa bwa bmazhin n migni yi jesun. 32Oza nwo nyaga Shekwoyi ɓeda da nyayi, wo ɓa mi wa wan wohin tukwo ko wa pmi owo ʼsa nwo ɓa daɓo ce yi. 33Ntuge Shekwoyi to yi yi ntu naɓo ajegmi ɓo nu m, ama n bugbafu ɓo nu, ngye shi ko nyi n na ikklisiya aza Gyi-gyi-yi nya vinya.

34Anyikwo ɓa ku ce pi fi na duwa nyakun. Ato ye ge ɓa daɓom, shi ko nyi ɓa fi n na nugbai sinta nu shi Littafi Gyi-gyi-yi ku da. 35Ndei ɓa ɓenyahoi lo, sai ɓa nya ɓa ʼɓa n napi, ntuge ko zhin vinyiko ɓo nu nyikwoza wa daɓo dna na duwa nyakun.

36Fye to ye cen? Fye gye ge Shekwoyi ɓeda yekpe kwa pa nfya ba nu, ko ko zozhi nfya ba na? Fye ku bwi aba. 37Ndai zaho gyelo ge wo zhin Shekwoyi tnu-tnuyi nu, ko kwa ge wo n Zafun nyagai lo, to sai wo kpe ge ɓeda ye nmi kaga fye nyi ko zhin Shekwoyi gbetu nu. 38Ama oza n woto shi ɓeda ye bwam, fye fawo dna nwo tnayekpe.

39Ntucenu omazaje fye la bugba gna shi fya bwa nyaga Shekwoyi ɓeda da nya nu, ama fye to gna ɓeda n na nyitalai gbo-gbo zhin ɓenukoi num. 40Ama fye zhin nyaho-nyahoi tu zokwo n bmiya bmiyai.